الرشوه

 … كتير اوى بنسمع جملة اعمله قضيه رشوه … وخصوصا لما حد بيطلب من حد حاجه قصاد انه يخلصله مصلحه أو خدمه أو شغلانه … إنما المشكله الى الناس ماتعرفهوش أن فى شعره بسيطه بين قضية الرشوه وقضية النصب … وهى أن بختصار كده أن أول شرط فى قضية الرشوه هو أن يكون المرتشى موظف عام … !!! وطبعا مش اى حد بينطبق عليه الشرط ده لأن الموظف العام له شروط معينه إنما لو تم إثبات المرتشى ده مش موظف عام فا كده مافيش قضيه رشوه وممكن تكون نصب أو سرقه أو أى حاجه تانيه .. وعلى فكره جريمة الرشوه جنايه مش جنحه وممكن يكون فيها كذا متهم يعنى المرتشى متهم والراشى متهم ولو فى وسيط بينهم بيكون كمان متهم وجميعهم شركاء فى قضيه الرشوه سواء بالاتفاق أو التحريض أو المساعده … وطبعا مش عاوز اقولكم أن جريمة الرشوه جريمه كامله يعنى مافيش حاجه اسمها شروع فى رشوه … وقضية الرشوه بطبيعتها بيكون ليها إجراءات معينه زى أن الرشوه لو كانت فلوس مثلا بتكون ارقامها مسجله فى محضر رسمى ولو فى تسجيلات صوتيه بيكون فيها أذان من رئيس النيابه على الأقل … وبعد كده بيتم تفريغ تلك المحادثات … وكل ده طبعا لأن العقوبات فى جريمه الرشوه مغلظه لأن تقع من موظف عام … دى كانت معلومه بسيطه عن قضية الرشوه وان شاء الله قريب حنتكلم عن الاختلاس والاستيلاء على المال العام وغيرهم من تلك الجرائم …