مجموعه كتب دورية صادرة من مصلحه الشهر العقارى

دى مجموعه كتب دورية صادرة من مصلحه الشهر العقارى والتوثيق من مأموريات مختلفه بها تنبيه وتحذير من التوكيلات الصادرة من بعض مكاتب الشهر العقارى لانها تعرضت لكسر ابوابها وسرقه اختامها

الكلام ده مش فى  سنة واحدة ولكن سنوات مختلفه وكلها قديمه

ولكن عصابات الاستيلاء على العقارات والاراضى شغاله شغل نار بيه

وفى مكاتب شهر عقارى بعضها مايعرفش كل وقائع السرقه دى وبالصدفة رايحه اعمل حاجه بالشهر العقارى لقيت موظف بيسأل زميله وبيقوله التوكيل ده انا شاكك فيه زميله قاله سليم قلتله صادر منين قالى مكتب شهر عقارى مدينة حلوان حكيتله انه تم كسره وان فى كتاب دورى اصلا صادر بمراجعه اى توكيل صادر من المكتب ده

فمعلش زميلى العزيز اتعب شويه فى شغلك ومتأخدش التوكيلات بالظاهر

وفى قضيه بمكتبنا الموكل صحى من النوم لقى عمارته  التى بالقرب من منظمه الصحه العالمية تم بيعها مرتين وتم شهر عقد البيع الاول وتأشر بالعقد التانى على سجل طلبات الشهر

وكله ده كان بسبب توكيل مزور من مكتب شهر عقارى مدينة حلوان قدروا يطلعوا بيه مشهر رسمى طالع من شهر عقارى مدينة نصر وعقد ناقل للملكية من شهر عقارى مصر الجديدة

والحمدلله ثبت تزوير التوكيل ولكن طبعا القضايا المدنية والتحقيقات بالنيابه متدوالة منذ ٨ شهور  ، وفى تفاصيل طبعا ماينفعش احكيها

♦ نصيحه لكل محامى ولكل صاحب عقار

لازم تتأكد من عدم تزوير المشهر وعدم تزوير التوكيلات على الاخص لازم تتعب وتسأل بالذات لو رايح تشترى عقار

واوعى تنبهر بالمشهر اللى جايلك وتقول خلصانه وهروح اسجل لازم كل ورقه تروح تكشف عليها بنفسك

♦ لازم تعرف ان الاختام ليها كود وانه لو الورق اللى معاك مختوم بختم مختلف عن الختم الكودى السارى اعرف ان الورقة دى مزورة  ” الختم الكودى بيبقى ختم باارقام معينه”